|
|
|
Flestir horfa aðeins á þann þátt er lýtur að því að komast á sem skemmstum tíma frá þéttbýlisstöðum á Vestfjörðum og til Reykjavíkur. Minna fer fyrir umræðu um það hvort nokkur möguleiki sé á því að komast á milli fjarða innan Vestfjarða. Samt eru engar samgöngur svo mánuðum skiptir ár hvert, á milli þéttbýlissvæða á norðan- og sunnanverðum kjálkanum. Í öllu gaspri um samgöngumál, fer líka fjarska lítið fyrir ábendingum um úrlausnir og hvernig best sé að hátta þeim. Sjaldnast er hvatt til staðkunnugt fólk í þeim efnum, jafnvel þegar lokaskref eru tekin í einstökum málum. Það er líka eins gott að nefna snöru í hengds manns húsi að ætla heimamönnum að sjá um framkvæmd verkþátta með sínu hyggjuviti, hversu veigalítil sem verkin annars eru. Nú skal allt boðið út, helst á evrópska vísu, án tillits til þess hvort ríkið þurfi síðan ekki að draga lága tilboðsgjafa að landi með ærnum kostnaði. Sjaldan eru þær reiknitölur nefndar þegar talað er um hag af slíkum útboðum. Vegtenging á milli Dýrafjarðar og Arnarfjarðar og áfram suður yfir Dynjandisheiði verður vart á dagskrá fyrr en á öðrum áratug næstu aldar ef fram heldur sem horfir. Lítill dugur virðist til þess í héraði að knýja mál þar áfram svo viðunandi sé. Hrafnseyrarheiði er svo sem ekkert merkilegri en aðrir fjallvegir. Helst horfa menn á að sniðganga heiðina með jarðgöngum. Eftir þeim er sjáanlega löng bið og því hljóta menn að spyrja sig að því hversu lengi á að bíða. Það er algjörlega óásættanlegt að vestasti hluti Ísafjarðarbæjar sé án samgangna við aðra bæjarhluta allt að níu mánuði á ári þegar verst lætur. Það verður að bæta þar úr og um leið leysa vanda við tengsl við sunnanverða Vestfirði. Þetta er hægt í það minnsta til bráðabirgða með ýmsu móti. Það má t.d. gera lagfæringar á núverandi vegi til að koma honum upp úr mestu snjóakistunum. Það má líka nota þekkta aðferð Norðmanna til að gera slíkt. Það yrði einfaldlega gert með því að leggja akfær rör sem sett eru saman með stálbogum. Þau mætti leggja á þeim stöðum þar sem snjóar eru hvað erfiðastir og einfaldlega moka yfir þau með jarðvegi. Við þurfum ekki einu sinni að finna upp hjólið í þessum efnum, það er búið að því. Að vísu eru það fjandans Nojarar sem hafa þar verið á undan okkur. - Skítt með það, þeir hafa örugglega þurft að nota til þess skynsemisgen úr ætt ÍSLENDINGSINS Leifs Eiríkssonar. - Hörður Kristjánsson. |
Birt með leyfi höfundar
Til baka |
Upp aftur |