Vestmannaeyingar hafa nú viðrað hugmyndir sínar varðandi jarðgangagerð á milli lands og eyja.  Þar er talað um þrjá kosti,
hefðbundin jarðgöng, tilbúin göng í stokk sem liggur á hafsbotni og í þriðja lagi fljótandi stokkur sem tjóðraður er við legufæri á ákveðnu dýpi. Akfær göng til Vestmannaeyja hyggjast menn fjármagna á svipaðan hátt og Hvalfjarðagöng eru nú fjármögnuð óháð fjárveitingum ríkisins til vegagerðar.
   Á Vestfjörðum stóð nokkur styr á sínum tíma varðandi réttmæti þess að gera Vestfjarðagöng. M.a. var talað um að lítil umferð um svæðið gerði göngin í raun aldrei arðbær. Raunin hefur hinsvegar orðið sú að umferðin er mun meiri en áætlanir gerðu ráð fyrir sem trúlega breytir öllum arðsemisútreikningum. Varðandi frekari gangagerð á Vestjörðum hafa menn litið á takmarkað vegafé og þar sé röðin komin að Austfirðingum. Hinsvegar eru til menn sem bent hafa á svipaðar leiðir og Vestmannaeyingar viðra nú varðandi fjármögnun jarðganga og vegagerð og hafa Súðvíkingar m.a. gert samþykktir í þá veru.
Trúlega yrði arðsamasti kostur í þeim efnum göng um stokk eða brýr yfir Hestfjörð og Skötufjörð. Þar mætti ná fram styttingu á leiðinni til Reykjavíkur um hátt í 50 kílómetra. Þetta ásamt betri tengingu við Gilsfjarðarbrú með lagfæringu á Þorskafjarðarheiði, eða vegi um Arnkötludal, myndi gjörbreyta samgöngum  til og frá norðanverðum Vestfjörðum.
Menn horfa fram á að enn á eftir að fullgera vegina í Skötufirði og Hestfirði og því væri vel þess virði að skoða brúar- og eða
jarðgangagerð áður en ráðist er í dýrar lagfæringar sem skila engri styttingu á núverandi leið. Ef menn telja mögulegt að leggja slík göng alla leið til Vestmannaeyja, þá ætti það ekki að vefjast fyrir mönnnum að fara yfir tvo vesæla firði. Án efa myndi slík aðgerð stórauka umferð um Djúpveg frá því sem nú er, líkt og gerst hefur varðandi Vestfjarðagöng. Samhliða raunhæfum
arðsemisathugunum á þessum möguleika ættu menn líka að skoða fordómalaust Vesturleiðina svokölluðu. Vel má vera að sú leið geti skilað álíka eða jafnvel meiri styttingu vegalenda með jarðgöngum úr Dýrafirði og þverun fjarða í Reykhólasveit. Allt er þetta spurning um byggðastefnu og kostnað, en með Vesturleiðinni ynnist líka betri tenging á milli suður- og norðurhluta Vestfjarða. Mest áríðandi í þessu máli er að Vestfirðingar leggist ekki með tær upp í loft vegna þess að framkvæmdafé vegagerðarinnar sé af skornum skammti. Það er búið að sýna fram á að fjármögnunina má gera með öðrum og skjótvirkari hætti. Allt myndi þetta gera Vestfirði æskilegri búsetukost en nú er, ­ því fyrr, því betra!

­ Hörður Kristjánsson.

Til baka

Upp aftur