Mikil umræða varð á nýbyrjuðu ári um ríkisstyrk til þess að halda uppi áætlunarflugi milli Akureyrar og Raufarhafnar og margt var sagt af misjafnri speki.  Þó virtist ekki vera gagnrýnt að neinu ráði að styrkja flugleiðina, enda viðurkennt að rétt væri að tryggja samgöngur við Raufarhöfn.  Þetta leiðir hugann að ástandi mála hér á Vestfjörðum.  Flugleiðin Reykjavík - Gjögur er styrkt af sömu ástæðu og flugleiðin til Raufarhafnar,en hins vegar vantar algerlega að ríkisvaldið geri nokkuð til að tryggja reglubundnar samgöngur milli norður og suðursvæðis Vestfjarða.  Að jafnaði er landvegurinn algerlega ófær að vetri til og til skamms tíma hafa engar flugsamgöngur verið milli Ísafjarðar og Patreksfjarðar/Bíldudals.  Nýlega hefur Íslandsflug hafið áætlunarflug tvisvar í viku þarna á milli, en án alls stuðnings og fjarri er að ferðatíðnin sé fullnægjandi.  Gera verður þá kröfu að ríkisvaldið tryggi daglegar ferðir þarna á milli þann tíma sem landleiðin er ófær og haldi heiðunum opnum meðan svo snjólétt er sem raun ber vitni.  Í síðustu viku leyfði ég mér að bera fram svofellda fyrirspurn til samgönguráðherra:  Hvernig verða tryggðar samgöngur milli norður - og suðusvæðis Vestfjarða ?  Hvenær verður breytt reglum um snjómokstur á Dynjandis- og Hrafnseyrarheiðum og verður veittur styrkur til áætlunarflugs milli Ísafjarðar og Bíldudals/Patreksfjarðar.  Fyrirspurnin verður að öllum líkindum svarað fljótlega og verður þá fróðlegt að fræðast um áform ríkisstjórnarinnar.
/

Í liðinni viku var fyrri umræða á Alþingi um vegaáætlun til næstu 12 ára.  Þar eru auðvitað mörg ágæt áformin að finna, þótt það verði að segjast eins og er að margir eru vantrúaðir á einlægni ríkisstjórnarinnar í ljósi reynslunnar.   Vegaáætlunin sem samþykkt var skömmu fyrir síðustu Alþingiskosningar, hefur verið skorin niður á hverju ári og niðurskurðurinn hefur heldur farið vaxandi og er tæplega 1.200 milljónir króna þetta árið.  Það er frekar ótrúlegt að ætla að leika sama leikinn, að samþykkja nýja stórhuga áætlun á síðasta ári fyrir Alþingiskosningar, þar sem framkvæmdir eiga að aukast eftir næstu kosningar.
En hvað um það, mesta athygli mína vekur að ekki er gert ráð fyrir neinum jarðgangaframkvæmdum á næstu 13 árum eða fram til 2010.  Það er algerlaga óásættanlegt og ég tel að setja eigi að jafnaði a.m.k. einn milljarð króna til jarðgangaframkvæmda á þessu tímabili.  Þar geri ég ráð fyrir jarðgöngum milli Arnarfjarðar og Dýrafjarðar.  Ég tel nauðsynlegt að tengja saman Vestfirði sem fyrst með þessum hætti.  Gert er ráð fyrir að bílferja gangi síðan daglega um Arnarfjörð til Bíldudalsog er þá miðað við nokkuð tíðar ferðir.  Með þessu móti tekst að tengja saman byggðirnar fyrir mun minni kostnað en áætlað er að þurfi að verja til þess að tengja saman Dýrafjörð og Vatnsfjörð, þar sem Dynjandisheiði er geymd um sinn.  Þessi hugmynd hefur þann kost að vera mun einfaldari og ódýrari og meiri líkur á því að vinna henni stuðning auk þess að vera mun markvissari, þar sem sem byggðirnar Þingeyri og Bíldudalur eru tengdar saman með beinum hætti.  Bílferjur eru til t.d. er ljóst að Fagranesið verður ekki lengi í siglingum um Ísafjarðardjúp og  það er til þess að gera ódýrt að reka þá ferju í siglingum yfir Arnarfjörð.  Siglingatími er stuttur samanborið við aksturstíma þegar fært er landleiðina.   Rannsóknir verða að skera úr um hvar best er að leggja jarðgöngin, en álitlegt er að leggja þau undir Hrafnseyrarheiðina og síðan gengi bílferjan  frá Hrafnseyri til Bíldudals.  Þessi samgöngustefna nýtur stuðnings þingflokks Alþýðubandalagsins og var kynnt í umræðunni á Alþingi um vegaáætlu í síðustu viku.  Ég vil leyfa mér að kynna hana hér og vonast til þess að Vestfirðingar telji gagn að liðsinni okkar í þessu máli.
 
 

Til baka

Upp aftur