Grein þessi birtist í Morgunblaðinu 28. nóvember 1998

Vegur um Bröttubrekku, segir Sigurbjörn Sveinsson, er lykill að góðum notum af Gilsfjarðarbrú.

Til lítils er brú án vega
   Á dögunum var nýr vegur og brú formlega opnuð fyrir minni Gilsfjarðar.  Eins og fram hefur komið er þetta mestur vegur í sjó sem gerður hefur verið hér á landi, þótt brúin sé ekki mjög löng.  Því hefur verið brotið blað í vegagerð á Íslandi.  Fyrst og fremst er brúin samgöngubót fyrir Vestfirðinga, en jafnframt samgöngubót fyrir alla aðra landsmenn, sem þangað eiga erindi.  Frá því að hugmyndinni um vegagerð af þessu tagi í Gilsfirði var fyrst hreyft, hefur hún átt skilningi að að mæta hjá forystumönnum og almenningi.  Auðvitað tók það nokkurn tíma að stilla saman strengi þeirra, sem um áttu að véla, og rannsóknir og hönnun kröfðust síns tíma.  En verkið tók stuttan tíma eftir að hafið var og er nú hin mesta prýði.  Það sjá allir sem um veginn fara.
   Sumarið 1997 var lokið við að fylla í veginn þannig að akfært varð um fjörðinn.  Þá héldu heimamenn nokkurt hóf í Bjarkarlundi.  Halldór Blöndal, samgönguráðherra, flutti þar stutt ávarp.  Var eftir því tekið, að hann fjallaði lítið um verkefni á svæðinu í smáatriðum, en hann tók hins vegar skýrt fram, að það væri til lítils að leggja í svo stóra framkvæmd, ef ekki fylgdu henni vegabætur í sama stíl.  Var gerður góður rómur að máli ráðherrans.
   Staðreyndin er sú, að samgönguleiðir, sem til brúarinnar liggja að sunnan og frá henni til vesturs, eru gamlir vegir og úr sér gengnir og hin verstu torleiði.
Tenging við Vestfirði

   Fyrir liggur að bæta vegi bæði til sunnanverðra Vestfjarða og í Djúpið.  Sums stað á leið í Flókalund eru góðir vegarkaflar  en inn á milli gamlir og ónýtir vegir, krókóttir og niðurgrafnir.  Þessa vegi er að finna m.a. á fjallvegum, t.d. á Klettshálsi, og er þá að vonum erfitt og raunar útilokað að halda þeim opnum nema í allra snjóléttustu vetrum.  Tenging við Djúpið hefur ekki verið ákveðin, en til greina koma tveir möguleikar.  Annar er úr Geiradal í Austur-Barðastrandarsýslu í Arnkötludal í Strandasýslu, en hinn er úr Þorskafirði um Þorgeirsdal á nýja veginn á Steingrímsfjarðarheiði.  Ákvörðunin um vegagerð á Steingrímsfjarðarheiði var af pólitískum toga, enda höfðu þingmenn nokkrar málsbætur, þegar litið var til hagsmuna allra Vestfirðinga að þessu leyti.  Best fer á því að ná sem víðtækastri samstöðu um þessa vegagerð.  Hafa samtök sveitarfélaga á Vestfjörðum þegar ályktað með vegagerð um Arnkötludal.  Mun það vafalítð vega þungt þegar ákvarðanir verða teknar.  Á meðan þeirra er beðið verður að sinna lágmarksviðhaldi á Þorskafjarðarheiði, sem nú er eini kostur þeirra, sem vestur fara og ætla að nota Gislfjarðarbrú.  Vegna viðhaldsleysis er sá vegur hræðilegur yfirferðar og tæplega reiðfær, hvað þá bílfær.

Brattabrekka

   Brattabrekka er helsti farartálmi milli Gilsfjarðar og Borgarfjarðar. Þetta er fjallvegur, sem liggur í u.þ.b. 400 m. hæð.  Hann er 14 km langur og þar af eru um 7 km í yfir 200 metrum.  Vegarstæðið er gamalt en smávægilegar bætur hafa verið gerðar á vegi og brúm í áranna rás.  Tilgangur þeirra hefur fyrst og fremst verið að draga úr öxulþungatakmörkunum og laga verstu slysagildrur.  Lítið hefur verið hægt að gera til að draga úr snjóþyngd og lengja tímannn sem vegurinn er opinn, þar sem meira þarf þá að koma til en smáaurar.  Í skýrslu Vegagerðar ríkisins um Bröttubrekku frá 1979, bls. 2, segir:  "Núverandi vegur á þessu svæði er lítils virði.  Vegferillinn samanstendur af bröttum brekkum, blindum hæðum og kröppum beygjum, enda hefur vegurinn lengi verið talinn hættulegur.  Ekki á það síst við er hausta tekur, þegar svellbólstrar taka að myndast.  Á tveggja kílómetra svæði sunnan við Miðsdalsgil er hætta á snjóflóðum og aurskriðum."  Nú standa fyrir dyrum endurbætur á þessum vegi til að gagnast þeirri umferð, sem um hann á að fara í framtíðinni.  Lagðar hafa verið til hliðar umtalsverðar fjárhæðir á langtímaáætlun í vegamálum.  Horfið hefur verið frá hugmyndum um jarðgög og eru nauðsynlegar endurbætur taldar kosta um 300 milljónir króna.  Gallinn er einungis sá, að ekki er gert ráð fyrir, að vegurinn taki á sig þessa framtíðarmynd fyrr en eftir miðjan næsta áratug.
   Það liggur í augum uppi, að vegurinn um Bröttubrekku er lykill að góðum notum af Gilsfjarðarbrú og lykill að greiðum samgöngum allra Dalamanna og Vestfirðinga suður á bóginn - og til baka.
   Það er eðlileg krafa, að þessi áform verði endurskoðuð og að vegabótum á Bröttubrekku verði lokið árið 2010.  Til þess hníga margvísleg rök og verður vikið að þeim síðar.

Höfundur er læknir.
 
 
 

Til baka
Upp aftur