Til eru nokkrar aðferðir við að meta heppilega fjarlægð í næsta bíl fyrir framan þegar ekið er á vegum úti. 

Ein helsta reglan er stundum nefnd "þriggja sekúndna reglan."  Reglan felur það í sér að þegar næsti bíll á undan fer fram hjá einhverjum föstum punkti eða kennileiti; vegstiku, umferðarmerki eða þ.h. telur ökumaðurinn sem á eftir fer sem svarar þremur sekúndum, 1..., 2...,3.  Ef  hann er ekki komin að kennileitinu áður en talningunni lýkur ætti bilið milli ökutækjanna að vera nægilegt, að sjálfsögðu miðað við bestu aðstæður.

Önnur regla segir:  Hafðu bilið að næsta bíl í metrum talið sömu tölu og hraðamælirinn sýnir, þ.e. 60 metra á 60 km hraða, 70 metra á 70 km hraða, 90 metra á 90 km hraða o.s.frv. 

Í umferðarlögum nr. 50/1987 er í 4. kafla "Umferðarreglur fyrir ökumenn" svohljóðandi ákvæði um 
 framúrakstur :  Helstu ákvæði eru undirstrikuð: 

Framúrakstur.
 20. gr. Aka skal vinstra megin fram úr ökutæki. Þó skal aka hægra megin fram úr ökutæki, ef ökumaður þess beygir til vinstri eða undirbýr greinilega vinstri beygju. Hjólreiðamaður má fara hægra megin fram úr öðrum ökutækjum en reiðhjólum.
 Ökumaður, sem ætlar fram úr ökutæki, skal ganga úr skugga um, að það sé unnt án hættu, og athuga sérstaklega:
   a. að akrein sú, sem nota á til framúraksturs, sé án umferðar á móti á nægilega löngum kafla og að ekki sé annað, er hindri framúraksturinn,
   b. að sá, sem á undan er, hafi ekki gefið merki um, að hann ætli að aka fram úr öðru ökutæki,
   c. að enginn, sem á eftir ekur, hafi byrjað akstur fram úr honum, og
   d. að hann geti komist inn í umferðarstrauminn á ný án óþæginda fyrir aðra, þegar framúrakstri lýkur. Þetta á þó eigi við um framúrakstur á akrein þar sem mótumferð er óheimil.
 Sá, sem ekur fram úr, skal hafa nægilegt hliðarbil milli ökutækis síns og þess, sem ekið er fram úr. Sá, sem ekið hefur vinstra megin fram úr, skal aka til hægri á ný, svo fljótt sem unnt er án hættu eða óþæginda. Hann þarf þó ekki að aka til hægri, ef ætlunin er að aka þá þegar fram úr enn öðru ökutæki og skilyrði til framúraksturs eru að öðru leyti fyrir hendi.
 Aka má fram úr ökutæki í vegavinnu á þann hátt sem hentugastur er, enda sé sýnd full aðgæsla.
 21. gr. Þegar ökumaður verður þess var, að ökumaður, sem á eftir kemur, ætlar að aka fram úr vinstra megin, skal hann vera með ökutæki sitt eins langt til hægri og unnt er. Má hann ekki auka hraðann eða torvelda framúraksturinn á annan hátt.
 Ef ökutæki er ekið hægt eða er fyrirferðarmikið og akbraut er mjó eða bugðótt eða umferð kemur á móti, skal ökumaður gæta sérstaklega að umferð, sem kemur á eftir. Ef það getur auðveldað framúrakstur skal hann aka til hliðar eins fljótt og unnt er, draga úr hraða og nema staðar, ef þörf krefur.
Bann við framúrakstri.
 22. gr. [Eigi má aka fram úr öðru ökutæki rétt áður en komið er að vegamótum eða á þeim. Heimilt er þó að aka fram úr öðru ökutæki ef skilyrði til framúraksturs eru að öðru leyti fyrir hendi og
   a. ökutækin eru á akbraut með tveimur eða fleiri akreinum í akstursstefnu þeirra,
   b. aka skal hægra megin fram úr vegna ökutækis sem beygt er til vinstri,
   c. umferð á vegamótum er stjórnað af lögreglu eða með umferðarljósum, eða
   d. umferð hefur forgang gagnvart umferð af hliðarvegi, sbr. 2. mgr. 25. gr.]1)
 Eigi má heldur aka fram úr öðru ökutæki, þegar vegsýn er skert vegna hæðar eða beygju á vegi, nema unnt sé að aka fram úr á akrein þar sem umferð á móti er óheimil.
 Ákvæði greinarinnar á ekki við um akstur fram úr reiðhjóli eða léttu bifhjóli.
   1)L. 44/1993, 5. gr.
Framúrakstur og akreinaskipti í [þéttri umferð].1)
   1)L. 62/1988, 1. gr.
23. gr. Í þéttri umferð ökutækja á tveimur eða fleiri akreinum í sömu akstursstefnu þar sem hraðinn ræðst af þeim, sem á undan fara, má aka hægra megin fram úr ökutæki á annarri akrein. Þegar þannig stendur á má ekki skipta um akrein, nema þess þurfi til að beygja á vegamótum, aka af akbraut, stöðva ökutæki eða leggja því.
 Aka má fram úr ökutæki, ef öðru ökutækjanna er ekið á akrein, sem ætluð er sérstakri tegund umferðar.
Framúrakstur við gangbraut.
 24. gr. Eigi má aka fram úr ökutæki rétt áður en komið er að gangbraut eða á henni. Ef umferð við gangbraut er stjórnað af lögreglu eða með umferðarljósum, má þó aka fram úr ökutæki, ef það hindrar eigi útsýn yfir gangbrautina.
 

Forsíða - Um vefinn - Almennt - Annáll - Vegalengdir - Leiðir - Byggð - Vetrarumferð - Ár / sjór - Jarðgöng - Kostnaður - Afstaða  - Ýmislegt - Fréttir - Stuðningur

Gestabók - Póstur

Til baka Upp